Вообичаениот начин на бришење податоци од некој уред не е ефикасно решение ако сакаме трајно да ги избришеме податоците, бидејќи постојат начини за нивно враќање со помош на специјален софтвер. Решението за ова се програми кои користат сложени алгоритми за разложување (decomposing) на податоците во дигитална „каша“, која повеќе не може да се врати во својата оригинална форма. Eraser e бесплатна апликација за Windows [APPLICATION] која може целосно да ги отстрани податоците од хард дисковите со тоа што ќе ги пребрише неколку пати, со користење внимателно одбрани начини.

Што се однесува на оптичките дискови (CD-а, DVD-а), најелегантeн начин за нивно трајно уништување е да се користи специјален шредер (shredder) којшто, освен хартија, може да уништува и дискови. На интернет можат да се најдат мошне опасни начини за тоа како физички да се уништат хард дискови, со користење киселина врз дискот или со негово горење, и нивната употреба не се препорачува. Хард дисковите содржат разни штетни хемикалии, кои можат да доведат до отровни и запаливи испарувања.

Ако старата опрема е подготвена за продажба или ако хард дискот е наменет за фрлање, ќе треба да направиме темелно чистење, дури и ако не работат. Софтверот што го прави ова на многу ефикасен начин еDarik's Boot и Nuke. Добрата пракса упатува на тоа дека, кога се ослободуваме од старата опрема (откако специјален софтвер направил темелно чистење на дисковите), таа се расклопува за да се уништат портите и да се скршат пиновите на конекторите.

Дигитална хигиена Апликации Протекување на податоци

Секоја платформа има неколку точки кои се најчеста цел на напади. Доколку програмерот на веб-страницата (web developer) обрне внимание на овие зони кога ја креира страницата, тоа значително ќе ги намали ризиците врз страницата и ќе овозможи непречен пристап до неа:

• Формулар за контакт, анкети и другите делови од веб-страницата каде што корисниците можат да внесат податоци се места со најголем ризик бидејќи овозможуваат директен пристап до системот. Ако не се неопходни за функционирање на страницата, добро е да не користите формулар за контакт, додека за анкетите може да се нагоди да се ограничат на еден запис по IP-адреса. Секако дека може да се развие интерактивен однос со корисниците, но тоа да се направи во посебен простор којшто не е директно поврзан со самата веб-страница;

• Базата на податоци е исто така еден од поризичните делови на сајтот. Доколку ѝ се испраќаат нелогични и сложени прашања, базата на податоци може да се блокира и тоа ќе им оневозможи на корисниците пристап до страницата. Решение за ова е строго да се потврдува секој запис (внес) во базата на податоци и да се спречат нелегитимните барања преку URL или на друг начин;

• Бесплатен софтвер од трета страна, којшто е инсталиран на платформата за таа да биде поинтересна, често може да претставува дополнителен ризик. Овој софтвер обично содржи разни теми или други нешта кои ја подобруваат функционалноста и изгледот на страницата, но кои може да содржат и код или безбедносен пропуст што го загрозува интегритетот на страницата. Затоа е важно секогаш да се користи софтвер што е креиран од веродостојни извори, односно софтвер за којшто има доволен број позитивни критики на интернет.

Сајт IP адреса Хостинг

Според најопштата класификација, техничките напади можат да се извршат или без директен пристап до серверот, или со потреба од пристап до серверот. Во првата група најчесто се инциденти чија главна цел е да се спречи пристапот до содржината на страницата.

Постојат неколку начини со кои може да се турне серверот, а оној што најчесто се користи е нападот наречен DDoS (дистрибуирано одбивање услуга) . Ова значи дека огромен број уреди истовремено испраќаат барања за пристап до нападнатиот сервер, којшто не може да одговори на нив во исто време и, едноставно, престанува да работи. Откако нападот ќе заврши, серверот и страницата продолжуваат да работат нормално (во повеќето случаи).

Рансомвер е вид малициозен софтвер што ги шифрира датотеките, и тоа од еден компјутер па до цела мрежа, вклучувајќи ги и серверите, така што не може да им се пристапи на тие датотеки без клуч за нивно дешифрирање. Напаѓачите потоа бараат плаќања во криптовалути за да ви го дадат клучот за дешифрирање, обично со краток рок, за да извршат поголем притисок врз жртвата.

Фишинг е искористување на недоволното знаење или на лековерноста и најчесто се прави преку е-пошта. Обично се користи за разни видови измами, како што е познатиот „Принц од Нигерија“ , инфицирање уреди со малициозен софтвер или добивање пристап до чувствителни информации, како што се финансиски податоци или корисничкото име и лозинката за најавување. На потенцијалните цели им се испраќа лажна порака која е направена да изгледа како да е автентична и како да ја испратил некој од одредена функција, како од банка или од полиција. Ваквата порака бара од примачот да ја отвори приложената датотека или да кликне на линкот за да направи нешто што е многу важно, на пример, да ги ажурира информациите во врска со својата банкарска сметка или да види дека добил уплата.

Пресретнувањето на комуникацијата (глас, видео, текстуални разговори, интернет-сообраќај) исто така претставува ризик, бидејќи има субјекти, како што се разузнавачки агенции и криминалци, кои имаат напредни способности и ресурси да вршат надзор на комуникациски канали што не се шифрирани. Нештата како што ехакирање од страна на државни органисе работи кои стануваат сè поопасни за приватноста на комуникациите на граѓаните, поради растечката индустрија за вршење надзор, која постојано развива и продава еден напреден производ по друг.

Вбризгување код (code injection) е пософистициран вид напад којшто се случува кога злонамерен код се вметнува преку некој отворен формулар на страницата или преку URL. Целта на нападот е да се поттикне базата на податоци или друг дел од страницата да врши операции кои немаат видлив резултат, но ги црпат ресурсите на серверот додека не го преплават со активности, со што ќе го исклучат. Понекогаш, откако ќе се случат вакви напади, страницата станува неупотреблива, па содржината се обновува со последната зачувана копија. Редовното правење резервна копија на веб-страницата со право се смета за основна безбедносна процедура.

Тројанци те кои влегуваат во системот се први на листата кога станува збор за број на напади. Корисниците обично ќе се заразат на некои чудни и несекојдневни интернет-страници каде што несовесно го прифаќаат предупредувањето дека се „заразени“ и со тоа активираат лажен антивирус. На овој начин, секоја година се извршуваат милиони хакерски напади, со што тројанците убедливо водат во однос на другите хакерски напади. Најдобра заштита од овој вид напади е едукацијата и информирањето во врска со современите форми на закани. Во рамките на самите организации, овој проблем донекаде се решава со филтрирање на страниците на кои може да им пристапи компјутер од локалната мрежа.

Компјутерските црви се малициозни програми кои се размножуваат и користат компјутерски мрежи за да се пренесат и на други компјутери, најчесто без да има потреба од интервенција од човек. Тие можат да пристигнат како прилог (attachment) на е-пошта и функционираат благодарение на безбедносните пропусти во оперативниот систем. Најдобра заштита од вакви напади се антивирусен софтвер и квалитетни лозинки [PASSWORDS]. Други добри методи се заштитните ѕидови, да не се отвораат сомнителни електронски пораки и редовни ажурирања на софтверот.

Онлајн малтретирањето (harassment) вклучува повеќе форми на злоупотреба, како што се имитирање (т.е. некој што отвора лажна сметка на социјалните мрежи или електронска пошта со ваши лични податоци), кампањи за оцрнување, говор на омраза, закани, сајбердемнење итн. Кога ќе се случат вакви инциденти, најдобро е да ги пријавите и да ги блокирате конкретните сметки и да соберете секакви дигитални докази што ќе се користат за потенцијално поднесување кривична пријава: релевантни линкови или URL-адреси, слики од екранот (screenshot) на профили и пораки, логови за направени повици од телефон/апликација и слично.

Нападите кои бараат пристап до серверот најчесто се сложени и посериозни. Нивна цел е кражба на податоци, промена на содржината, пласирање лажна содржина и оневозможување на пристапот до содржината. Овие напади имаат сложена природа бидејќи напаѓачот мора да ги пробие сите безбедносни мерки што се поставени на серверот за да дојде до одредени лозинки, шифри за пристап и слично. Тие бараат и поголема стручност на напаѓачот.

Сервер ДДос напад Дигитална хигиена Малвер Вознемирување Сајбер криминал